时间  2小时 12分钟

航迹点数 617

上传日期 2016年1月23日

记录日期 一月 2016

-
-
201 m
-16 m
0
1.7
3.3
6.67 km

浏览次数: 933次 , 下载次数: 3次

邻近 Yau Ma Po (Hong Kong)

2016年1月23日晨,氣溫在7°C左右,西貢海濱公園起步,沿海濱往沙下海灘,迎面而來的霸王級烈風,連外籍放狗人士亦大叫crazy,途中偶遇2位婆婆正準備下水,佩服,佩服。

經過海灘旁的燒烤場和泰國餐廳,轉左往上走一段車路,便到達大網仔路,向右轉沿大網仔路直走,經過一所公厠,不久後須橫過馬路,來到禾寮村村口,村口何氏家祠旁空地升起了一支中國五星紅旗,迎風飄揚。

沿禾寮村入口上走,轉右沿水泥徑,穿過禾寮村、澳頭村,便再次到達行車公路,西沙路,小心橫過馬路,轉左向水浪窩方向進發,到達水浪窩,今早應該有比賽Hong Kong 100 Ultra Marathon正在進行,有義工正在放置參賽者行李袋及負責補給食物,沿途亦見到很多HK100的路標。

於水浪窩小休後,再次小心地橫過西沙路,向麥理浩徑四段進發,沿企嶺下林道,經過水浪窩露營地點,走至竹洋路轉左,經山寮返回西沙路。

由於天氣寒冷,走畢全程都沒有出汗,亦沒有飲過水,故背包和水樽可留待明天再出發。

P.S. Hong Kong 100 Ultra Marathon 因終點大帽山路面結冰,多名參賽者受傷被困山上,賽事因而於星期日早上腰斬。

以下為其中一個被困山上的HK100參賽者facebook的記錄實況:

https://www.facebook.com/realgene/media_set?set=a.10156508892970055.1073741920.518820054&type=3

『我係其中一個被困山上的HK100參賽者,我要紀錄呢一件事,記錄實況,呢篇文章好長,希望你地可以睇到尾,希望俾多一啲資訊你,從多角度去睇呢件事。
事情始末:
比賽前準備及比賽頭90km我都唔講住,星期日4am鉛礦坳上大帽山一段沿途落雨,心諗,點解啲雨打落塊臉咁痛嘅,過一陣先知嗰啲係冰,沿途泥路石面都結冰了,還好有草地可行。
星期日6am到了四方亭,諗住咁辛苦,終於捱到馬路,原來呢段先係最甘!
上斜坡幅45度,行咗兩步唔對路,點解係咁溜後?!原來呢度都結冰了,唯有行側邊草地,行咗兩段斜路,第3段側邊無草了,喺呢度一面小平地,前面好幾個人都滑倒了,我地大家互相幫忙,滑過馬路另一邊,扶住鐵絲網上,上到轉彎位,無草地無鐵絲網!
我地,係講緊幾十名參賽者,有人選擇走出馬路繼續上,我地選擇返落去避風,落返好滑嗰塊地,此時亦絡續有其他參賽者到,其中一位即時滑到,扶返佢起身時, 下半邊臉都係血!佢跌到嘴唇崩了一忽肉,不停流血,臉亦受傷,鼻內亦有血,我即刻打俾終點的仲威,叫佢幫手CALL白車;而此時仲威亦通知我,大會腰斬了 賽事,既然如此,我地都無趕住走,諗住等無咁大風才走。
此時BT去搵地方避風,搵到幾間荒廢石屋,同咗Margaret及一名日本選手入去。
而我同Chris就喺度陪受傷的參賽者等白車嚟。
與此同時,另外一班人在空地前少少位置有樹的地方避風,我地就行過去等。
喺嗰度有幾個人有好凍,要用太空毯包住自己,大家互相幫忙,夠暖的幫忙照顧其他人,我身邊有個美藉華人,凍到震,可幸耐唔耐叫吓佢仲有反應,我地身上仲有食物,我都即刻俾朱古力,飯糰佢食,感覺佢食完嘢好少少。
呢個草地位置有30人,其中有參賽者打999,希望有人來救援。
當時收到的訊息係救護車已上緊山,但沿途太多私家車,塞住條路,上唔到嚟,但已絡續趕緊車走。
等多一個鐘,仲未到,但仲係好大風,結果全部人一齊移去廢屋。落斜,大部份人都係sir落去,意圖行的即刻跌低,撻生魚咁。
廢屋有幾間,我地去咗其中一間的二樓,嗰間無開窗,有門,好啲,無咁凍,大部份人都坐地下休息,有參賽者不斷同警方聯絡,告知地埗,因為廢屋內其實只有一個台間唔中收到訊號,等到中午,有2個消防員到咗,佢地係邊行邊扇低咁上山的。
佢一嚟到睇吓有無人嚴重受傷或低溫,好彩都無,但因為未能即時安排我地撒退,所以佢在屋內的另一間房用廢木起咗個火堆,俾大家取暖,我地無過去,因好大煙,頂唔住。
此時當大家都知道唔係即刻走到,絡續借電話報平安,(因為唔係個個台收到,我都係嗰個台,但似乎要室外先收到,我都無勇氣行出去又濕又滑又凍的地下去等個訊號),打完就繼續等。
Margaret雖然自己又凍又眼瞓,佢都周圍去同唔識廣東話的參賽者講返最新情況。
2pm,消防話大約3小時會有食物及飲品送到,有人追問,跟住點,幾時可以走,消防話直昇機油缸結冰嚟唔到,有人話:頭先我地先見到有直昇機吊起個人,消防就只係再重覆,不過我記得睇過本書係有咁講過話太凍直昇機,嗰啲燃料會結冰;而車路,塞死車唔到。
差不多同一時間,BT朋友阿PAUL竟然出現!!佢由梧桐寨上嚟,都係嚟救我地,佢話條路可以行,安全,可以帶大家一齊走。當然佢帶咗少少食物上嚟俾我地食。
亦差不多同一時間,民安隊有人來,佢都係帶我地走,佢俾我地選擇,一係留低等稍後情況可下由消防接走,一係跟民安隊離開,佢會協助大家走,留低的都有消防陪住,完全係基於個人選擇。
我其實腳好痛,我都擔心自己行唔到,出面又凍,但我知道三十幾人,無可能由直昇機救走,而車路塞死,我亦喺操山落大帽山時,見過好多次,啲車無位泊會泊路中間,或者同時有車上落山,無車肯退後讓路,如果要等清場,即係要等到星期一啲人返晒工先得。
而家只求安全落山,難得有人帶路,梗係走。
結果應該只有幾人無走,其他人跟2個民安隊離開。
臨出發落山前,有個本地女參賽者將太空毯撕開,分俾大家,幫大家圍喺頸,總之盡可能幫大家保暖。
我地3.30pm開始離開石屋,其實首先由二樓落地下,出到屋外已經即刻有人扇低咗,因路面已結冰。而啲石屋係有鐵絲網圍住,只係之前有人剪爛少少我地先可以捐出捐入。之前講過,沿途都係馬路,咁我地點走呢?
哈哈,就係走直線!!馬路係”之"字形,我地橫過馬路,爬山坡,走所謂嘅shortcut!!
好多謝民安隊的人員,佢地係民安隊的山區搜索隊(差唔多咁上下名,可能睇錯少少),開頭應該係得2個人,一頭一尾帶我地走,首先係要爬坡,即係你去玩 Action Asia Events或King of The Hills會玩的路段,但呢啲仲難,因為要爬繩先上到。民安隊一路鼓勵我地,每過一條馬路,都讚我地做得好好。爬完坡又話已經過咗最難嗰段,上到白坡,開 始愈來愈多救援人員,民安隊多咗人,消防亦加入陪我地落山,仲見到佢地一人攞住一袋5,6個飯盒,應該就係原先話3個鐘後會有的食物。
沿途要過冰馬路的都SET咗繩,幫我地過去。有啲路段係行唔到,就叫我地SIR落去,都有段SIR咗超過100米。
我都扇低咗幾次,有次撻低pat pat落地,即刻好驚,好驚撻親條大陣,痛咗10秒好彩無事。而沿途民安隊及消防都好照顧我地每一個,叫我地小心行,細細步,一有人跌親,即刻問我地有無 事,及有幾次,民安隊隊員都叫隊友mark實啲成日跌的人,有幾個人我估撻咗廿次以上。
其實沿途我地好多人撻親,好彩參賽者好好,互相幫忙,有一對pole的,都借一支俾人,我本來係告manman帶住我,佢問人借咗一支,好彩爬第一個坡時,有個國內參賽者見我無pole,主動借一支俾我,我先捱到去閘口。
沿途,有人好凍凍到震,民安隊即刻俾熱水佢飲,俾毛毯包住佢,幾個照顧佢。
我地我都估唔到平時呢段用20分鐘跑完嘅路,我地要7.30pm先去到閘口!!
去到呢度有好多消防車消防員接應,我地飲咗少少熱水,就上咗民安隊的車,最終7.45pm返到落扶輪公園,此時見到成個扶輪公園都係救護車,消防車,架車一到就成班記者衝過嚟影相。
我地到咗要入帳篷登記,總共登記4次,包括HK100,民安隊,警察同消防都分別問我地攞BIB NO,姓名,年齡等。最後我地差不多8.30pm先可以走。
個人感想:
早上6點幾時,我地未知賽事腰斬,我地上唔到嗰條馬路退返落平地時,無諗過要quit,無諗過要人救,只係諗,搵個地方吓風先。
而只係因為有人跌倒流血,我地先搵人call白車,都無諗過要車我地走。我地無離開廢屋,係唔知屋外狀況,如果條路仲係咁扇,就咁走係同朝早無分別。好彩paul嚟到俾到資訊我地。
我亦諗,我地無即時生命危險,無人受傷(爆嘴的止血了)真係唔使搵直昇機。我心諗,其實我地喺馬路邊,如果搵到架車車我地走,都唔係好高求啫。
原來我諗錯咗,人行唔到冰馬路,車都唔會行到。
所以我覺得民安隊嚟帶我地走,係當時最好的安排,佢地行山經驗夠,知道點行啲山路。
另外我想話消防唔使買冰爪鞋啦,人地民安隊都無,但人地都無扇低喎,點解咁叻呢?人地將對襪著喺對鞋出面咪唔扇囉,幾鬼聰明!
感謝:
感謝民安隊及消防處,多謝佢地協助我地落山,新聞只係講幾句,我要講俾大家知,民安隊今次都好幫忙,沿途照顧!
多謝Steve,Janet,Anky攪呢個比賽,我知你地今次面對好多指責,千萬不要氣餒,你地已經做得好好。
多謝大會咁多位義工,捱冷支援;無你地,呢個比賽攪唔成!
多謝咁多位朋友的及屋企人的關心,要你地擔心,真係唔好意思!』
  • 的照片 @9:00
  • 的照片 @9:00
@9:00
  • 的照片 @9:15
  • 的照片 @9:15
  • 的照片 @9:15
@9:15
  • 的照片 @9:20
@9:20
  • 的照片 @9:33
  • 的照片 @9:33
@9:33
  • 的照片 @9:40
@9:40
  • 的照片 @9:55
@9:55
  • 的照片 @10:00
  • 的照片 @10:00
  • 的照片 @10:00
  • 的照片 @10:00
  • 的照片 @10:00
  • 的照片 @10:00
@10:00
  • 的照片 @10:20
@10:20
  • 的照片 @10:25
  • 的照片 @10:25
@10:25
  • 的照片 @10:33
@10:33
  • 的照片 @10:35
  • 的照片 @10:35
@10:35
  • 的照片 @10:45
  • 的照片 @10:45
@10:45
  • 的照片 @11:00
  • 的照片 @11:00
  • 的照片 @11:00
@11:00
  • 的照片 @11:12
@11:12

评论

    You can or this trail